مدرسة انجليزي اماني السيد ٢

جمال نزل الصبح وهو لابس ومبتسم ابتسامة النصر، فاكر إن اليوم ده هو يوم رد اعتباره.. ميعرفش إن صاحب العقار اللي بيأجر منه المكان، طلع واحد من قرايب صاحب العمارة اللي السنتر بتاعي فيها، ومن أشد المعجبين بشغلي وشخصيتي، وكان المحامي بتاعي وصل له كل التفاصيل بالدلائل والأوراق.

جمال قعد في المكتب، وحط الشيكات والفلوس كاش على الترابيزة، والمنافس قاعد جنبه بيضحك وفاكرين إنهم خلاص حاصروني. وفجأة، قبل ما القلم يلمس العقد عشان يوقع، دخلت أنا المحامي بتاعي، ومعانا رجل الأعمال الكبير اللي كان سلفني الـ ٥٠ ألف جنيه في الأول!

جمال اتسمر في كرسيّه، القلم وقع من إيده، ووشه اتخطف وبقى زي الميتين. بصلي بذهول وهو مش قادر ينطق كلمة واحدة: «هـ.. هناء؟! إنتي إيه اللي جابك هنا؟»

قربت من الترابيزة بكل شموخ، وبصيت للفلوس الملفوفة وللعقود، وبعدين بصيت في عينيه وقالتله بصوت واطي وبارد سمع المكتب كله: «جيت أباركلك يا أستاذ جمال.. جيت أشوف المكان اللي اخترت تحط فيه كل تحويشة عمرك والقروض اللي أخدتها بضمان شغلك، عشان بس تكسرني وتثبت لنفسك إنك راجل».

المنافس وقف بغضب وقالي: «أنتِ دخلتي هنا إزاي يا أستاذة؟ دي صفقة خاصة ومفيش مكان ليكي معانا!».

رجل الأعمال اللي كان معايا حط إيده في جيبه وابتسم بثقة وقال للمنافس: «الصفقة دي اتلغت يا أستاذ.. عشان العمارة والمحلات اللي فيها كلها اتشرت بالكامل الصبح من صاحبها الأصلي، والمشتري الجديد هو أنا والأستاذة هناء، والشرط الجزائي اللي حطه جوز الأستاذة في العقد المبدئي.. بقى ملك لينا إحنا بنص القانون!».

جمال قام وقف، ركبه كانت بتخبط في بعضها، وبص لصاحب المكان اللي هز رأسه وقاله: «آسف يا أستاذ جمال.. الأستاذة هناء اشترت الدور بالكامل، والفلوس والعربون اللي دفعتهم دخلوا ضمن حسابات البيع وللأسف الشديد، طبقاً لبنود عقدك المبدئي، العقد ملغي بدون استرداد العربون لو المالك قرر يبيع العقار بالكامل!».

جمال حس إن السقف وقع فوق دماغه، الفلوس اللي شقا فيها طول عمره، الفلوس اللي كان حارم بيته منها، راحت في الهواء بضغطة زرار وبسبب غبائه وغله! مسك في طقطوقة المكتب وهو مش قادر يتنفس، والدموع اتجمعت في عينيه مش من حزنه عليا، لكن من خيبته وصدمته في تحويشة عمره اللي ضاعت.