زوجي مسافر روماني مكرم ٣
رفع إيديه بالكلبشات وبيترجاني:
* “بوس إيدك يا سمر.. أتنازلي عن قضية التزوير بس! سيبيني أرجع مصر أعيش بين أهلي حتى لو مفلس ومكسور، بلاش السجن والغربة والتخشيبة دي! اعتبريها حسنة.. اعتبريها عشان خاطر أيامنا الحلوة زمان!”
ابتسمت ابتسامة باهتة وخفيفة، ابتسامة الست اللي أدركت حقيقة الشخص اللي عاشت معاه في وهم:
* “أيامنا الحلوة؟ أنت سبت فيها حاجة حلوة يا إبراهيم؟ أنت قتلت كل ذكرة جميلة يوم ما سمعتك بودني بتقول لغيري ‘إنتي مراتي وحبيبتي ومفيش حد يأخد مكانك’. أنت ما فكرتش في أيامي الحلوة ولا في صبري سنتين وأنا بطفح الدم عشان أعملك قيمة وسند. أنت فكرت في نفسك وبس.. والنهاردة، القانون هو اللي بيفكر في حقك.”
* “يعني مش هتتنازلي؟” سأل وهو بينظر لي بذهول وعينين ماليانة رعب.
وقفُت من على الكرسي، وعدّلت الشال اللي على كتفي، وبصيت له للآخر مرة في عينه:
* “التنازل معناه إني بقرّ إنك كنت صح، وإني أستاهل الإهانة والسرقة. أنا خدت حقي بكرامتي والقانون.. الشقة في مصر رجعت لأهلها، وحق حاتم أخويا رجع، ومؤخري ومستحقاتي المحكمة حكمت بيهم. أما السجن والورطة اللي أنت فيها، فدي مش انتقام مني.. دي نتيجتك الطبيعية اللي زرعتها بإيدك. ربنا يمهل ولا يهمل يا إبراهيم.”
التفتّ واديت له ضهري..
صرخ بصوت هز الأوضة وهو بيبكي بكاء هيستيري والحديد بيرن في إيده:
* “سمر! أرجوكي ما تمشيش! سمر سامحيني يا سمر!”
ما بصلتوش ولا خطوة لورا. مشيت بخطوات ثابته وواثقة باتجاه الباب، وخرجت للهوا المفتوح بره مركز الشرطة. الأستاذ طارق كان مستنيني بابتسامة احترام:
* “كده ملفك اتأفل تماماً يا مدام سمر.. وباسبورك وتذكرتك معاكي، والمطار مستني.”
شكورته من كل قلبي، وركبت عربية التاكسي المتجهة للمطار.
طول الطريق للمطار، كنت بص على الشوارع المباني اللي كانت في يوم من الأيام حلم بالنسبة لي، الحلم اللي تحول لكابوس، والكابوس اللي انتهى بصلابة وعزة نفس.
وصلت المطار.. خلصت إجراءات الجوازات بلمسة واحدة على البصمة الإلكترونية، وقعدت في صالة الانتظار مستنية الإعلان عن الطيارة المتجهة للقاهرة.
فتحت التليفون.. لقيت رسالة من أخويا حاتم:
“البيت منور ومستنيكي يا سمر.. والشقة اتفتحت ورجعت بحكم المحكمة باسمك، وأمي بتدعيلك في كل صلاة.”
