زوجي مسافر روماني مكرم ١
بعد أسبوعين كاملين.. أسبوعين كنت بعيش فيهم تمثيلية مرعبة. بكلمه كل يوم، أضحك معاه، أطمنه على الشنط، أسمعه كلام الحب المزيف وهو يرد بنفس الحب المزيف.. وأنا في داخلي بغلي، كل كلمة حلوة كان بيقولها كانت بتنزل على قلبي زي مية النار.
جاء يوم السفر.
أمي وإخواتي كانوا معايا في المطارات، يزغرطوا ويبكوا من الفرحة: “مبروك يا سمر.. ربنا يسعدك يا بنتي مع جوزك ويجبر بخاطركم”.
كنت ببص لهم وأنا ببتسم ابتسامة باهتة.. لو يعرفوا أنا مسافرة لإيه! أنا مش مسافرة لبيت الزوجية.. أنا مسافرة لمواجهة
ركبت الطيارة.. الطيارة أعلنت الإقلاع. بصيت من الشباك على مصر وهي بتبعد تحت الغيم.. وحسيت إن حياتي القديمة هي اللي بتبعد، وإن اللي جاي مش معروف.
بعد أربع ساعات طيران.. وصلت المطار بره.
خلصت إجراءات الجوازات، أخدت الشنط، وخرجت للممر الخارجي.
من بعيد.. شفته!
كان واقف مستني، لابس القميص الكحلي اللي بحبه، وبيدور بوشه بين المسافرين بلهفة. أول ما شافني، وشه ينور ورفع إيده يلوح لي.
مشيت ناحيته ببطء.. خطوة.. ورا خطوة.. الشنط تقيلة في إيدي، بس ثقل قلبي كان أتقل بكتير.
أول ما قربت منه، فتح دراعاته عشان يحضنني:
* “سمر! الحمد لله على السلامة يا حبيبتي.. نورتي الدنيا!”
وقف في مكاني.. أخدت خطوة لورا بسيطة وتفاديت الحضن، ومسكت إيده ببرود:
* “الله يسلمك يا إبراهيم.. الحمد لله على الوصول.”
بص لي بستغراب، وشه اتغير شوية من جفاء رد فعلي:
* “مالك يا سمر؟ تعبانة من السفر ولا إيه؟”
* “تعبانة شوية.. يلا بينا على الشقة.”
أخد الشنط مني، ومشينا ناحية العربية. طول الطريق في العربية، كان بيحاول يفتح كلام.. يكلمني عن الشقة، عن الشغل، عن الأيام اللي جاية.. وأنا ردودي كانت كلمة وبتغطاها سكتة.
وصلنا العمارة.. عمارة فخمة في حي هادي. أخد الأسانسير وطلعنا الدور الثالث. وقف قدام الباب، طلع المفتاح من جيبه، وقال بابتسامة:
* “اتفضلي يا سمر.. بيتك ومطرحك.”
دخلت الشقة.. المكان كان هادي، الإضاءة خافتة، وريحة بخور هادية مالية المكان.
أول ما حط الشنط في الصالة، وقفت في نص الشقة، وبصيت حواليا. كان فيه جزامة صغيرة جنب الباب.. وعلى الجزامة، كان فيه جزمة حريمي أنيقة جداً لونها أحمر، وشال حريمي مرمي بإهمال على الكنبة في الصالة!
