عزومة حماتي روماني مكرم ٢
رجعنا البيت بسرعة جنونية، وأول ما أحمد فتح الباب ودخل، لقينا حماتي قاعدة في الصالة بتعيط، لكن سارة مكنتش موجودة. أحمد جِري على أوضتها وكسر الباب، ملقهاش! دولابها كان مفتوح وشنطة هدومها مش موجودة، كأنها فص ملح وذاب.
حماتي قالت وهي بتشهق: “أول ما نزلتوا، سارة لمت هدومها في شنطة وجريت.. سألتها رايحة فين مردتش عليا وزقتني وخرجت!”
حمايا قعد على الكرسي وهو بيبكي من كسرة النفس: “بنتي أنا تعمل كده؟ بنتي تحرق شقة أخوها وتدمر حياته؟ دي مش بني آدمة.. دي شيطان!”
أحمد طلع تليفونه وطلب رقم سارة، والكل كان كتم نفسه.. بعد كام جرس، الخط فتح، وسمعنا صوت نفس سارة وهي بتنهج من الهروب.
أحمد صرخ فيها وهو وعروقه بارزة: “أنتي فين يا مجنونة؟ الشقة حرقتيها.. شقى عمري ضيعتيه! ورب العزة ما هسيبك والشرطة هتحبسك!”
سارة ردت بصوت كله جنون وضحكة هستيرية تخوف: “أنا قولتلك الجوازة دي مش هتم.. وأنا مش هتحبس يا أحمد، لأني مش لوحدي، وفي حد إنت مستحيل تتوقعه هو اللي ساعدني وجابلي البنزين، وهو اللي كان عايز الجوازة دي تبوظ أكتر مني!”
أحمد صدمته كانت تالتة ورابعة وخامسة في نفس اليوم، وسألها بصوت مرعوب: “مين؟! أنطقي مين اللي ساعدك؟!”
سارة قالت بجبروت: “اسأل نادين خطيبتك.. اسألها مين أكتر حد قريب منها ومكنش طايق يشوفكم سوا!”
الخط قطع.. وأحمد لف وشه وبصلي بنظرة مليانة شك وصدمة، وأنا حسيت إن الدنيا دارت بيا.. مين من عيلتي أو القريبين مني ممكن يعمل فينا كده؟!
حكايات رومانى مكرم تابعو صفحه رومانى مكرم
البيت كله اتقلب نظراته عليا.. أحمد وباباه ومامته، الكل باصص لي وكأن السهم اِرتد لصدري أنا وأهلي. أبويا وأمي اللي كانوا لسه واصلين بعد ما عرفوا بموضوع الحريق، وقفوا مصدومين من الجملة اللي سارة رمتها قبل ما تقفل.
أحمد قرب مني وخطواته تقيلة، وعينيه فيها عتاب وكسرة تذبح: “نادين.. سارة تقصد مين؟ مين من عندكم اللي ممكن يعمل فينا كده؟”
أمي صرخت بدافع الأمومة: “بنتي وأهلها ناس شرفاء يا أحمد! إحنا هنيجي نولع في شقة بنتنا اللي هتتجوز فيها؟”
وفجأة.. الباب خبط بقوة.
أحمد فتح الباب وهو مش قاد، ولقينا ضابط المباحث ومعاه عسكري، وجارين في إيدهم شاب.. أول ما شفته، أبويا رجع لورا وصدمته كانت أكبر من صدمة الحريق نفسه.