القرص

😱 أكبر غلطة بتخلي القرص الفلاحي تطلع ناشفه أو مكتومه !
لو القرص عندك بتطلع تقيلة، ناشفة، أو مش هشة زي المخابز… فغالبًا بتعملي واحدة من الغلطات دي:

❌ بتحطي دقيق زيادة وقت العجن.
❌ بتسيبي القرص وقت طويل جوه الفرن فتنشف منك
بتسيبي العجينة تخمر زيادة فتفك وتبوظ.وريحتها تبقي خميره بعد الخبز
❌ بتدخليها فرن لسه مسخنش كويس.مش بتطلع هشه وبتكون مكتومه
❌ بتكتمي القرص وهو سخن فيعرق ويطري زيادة.
❌ بتستخدمي خميرة ضعيفة أو منتهية الصلاحية.

ولو عايزة قرص فلاحي هشة، مورقة، وطعمها يجنن… جربي الوصفة دي. 👌😍

💚 المقادير

– 1 كيلو دقيق = حوالي 8 أكواب.
– 1 كوب حليب = 250 مل.
– 1½ كوب ماء دافئ = 375 مل.
– 1¼ ملعقة كبيرة خميرة فورية = حوالي 12 جرام.
– 3 ملاعق كبيرة سكر = حوالي 40 جرام.
– 2 ملعقة كبيرة سمسم = حوالي 20 جرام.
– كوب دهون (⅔ كوب سمنة + ⅓ كوب زيت) = حوالي 150 جرام سمنة + 80 مل زيت.
– ½ ملعقة صغيرة ملح = حوالي 3 جرام.

🧀 الحشوة (اختياري)
أي نوع جبنة بتحبيه: إسطنبولي، فيتا، رومي مبشور، شيدر، أو ميكس جبن.

👩‍🍳 الطريقة بالتفصيل

1. في بولة كبيرة اخلطي الدقيق مع السكر والخميرة والملح والسمسم والسمنه وبسي العجينه كويس
2. ضيفي الحليب والمياه الدافية بالتدريج مع العجن لحد ما تتكون عجينة ناعمة ومتوسطة الطراوة.
3. اعجني من 8 إلى 10 دقائق لحد ما العجينة تبقى ملساء ومرنة.
4. غطيها وسيبيها تخمر من 10 الي 15 دقيقة
5.فرغي الهوا
6. قطعي العجينة كرات متساوية، وافردي كل كرة بإيدك، وحطي حبه صغيره من خليط السمنة والزيت، ولو حابة حطي الجبنة في النص.
7. اقفليها كويس وشكليها قرص، ورصيها في صينية مدهونة.
8. ادهني وشها بخليط السمنة والزيت، ورشي سمسم.
9. سيبيها تخمر مرة تانية من 20 إلى 30 دقيقة.
10. دخليها فرن ساخن مسبقًا على 200 درجة في الرف الأوسط لحد ما تاخد لون ذهبي جميل.
11. أول ما تطلع ادهني وشها سنة سمنة وهي سخنة وسيبيها تهدى على شبكة.

✅ نصايح النجاح

✔️ العجينة لازم تكون طرية شوية، متزوديش دقيق.
✔️ سخني الفرن كويس قبل ما تدخلي الصينية.
✔️ متفتحيش الفرن أول 15 دقيقة.
✔️ استخدمي سمنة بلدي أو سمنة كويسة عشان الطعم والورقات.
✔️ سيبي مسافة بين كل قرصة والتانية عشان تستريح وتنفش.
✔️ لو هتحشي جبنة، متكثريش منها عشان متفتحش أثناء التسوية.
✔️ بعد ما تبرد احفظيها في كيس محكم عشان تفضل طرية.

😍 جربيها مرة، وهتعمليها بعد كده على طول بنفس الطريقة.

👇 وقوليلي في الكومنتات…
إيه أكبر مشكلة بتقابلك في القرص الفلاحي؟ ناشفه؟ مكتومه؟
🧡 لو الوصفة عجبتكم
صلّوا على النبي ﷺ في التعليقات علشان تاخدوا أجر وأنا كمان
بحبكم فى الله ♥️♥️