مصاريف ولادتي زهرة الربيع
دول 5 تلاف جنيه يا عادل.. التلاتة بتوعك، وألفين زيادة عشان إقامات بنتي وأكلها في بيتي، عشان تبقى خالص وما تحسش إن حد أكل عليك مليم أو عاش على قفاك زي ما بتقول! بس اسمعني كويس.. الفلوس دي تمنها مش هيتدفع كاش، تمنها إن بنتي وابنها يلموا هدومهم ويرجعوا معايا حالاً، والراجل اللي يستكتر اللقمة والدوا على مراته وابنه في أضعف أوقاتهم، ما يأتمنش على بنتي ثانية واحدة!
عادل أول ما شاف الفلوس على الترابيزة وسع عينيه، ووشه بقى أصفر وزي ما يكون أتدلق عليه مية ساقعة. هو كان فاكر إنه هيحرج أبويا ويخليه يدفع وهو ساكت، بس ما توقعش إن أبويا يكسر عينيه بالكبرياء ده ويقلب الطاولة عليه في ثانية!
عادل اتلعثم وبقى مش عارف يقول إيه، بص للفلوس وبعدين بص لأبويا وقال وهو بيحاول يلحق الموقف يا عمي.. أنا.. أنا مقصدش كده.. أنا بس كنت بطلب التوضيح ومضغوط من مصاريف
السفر وال…
أبويا قطعه بكلمة واحدة وبصوت هز الصالة ولا كلمة يا عادل! ال 15 ألف اللي إنت ادتهوملها دول حقها وحق ابنك، واللي دفعه بيت أبوها أكتر من كده بكثير وما تكلمناش ولا حاسبناك.. بس إنت جيت على الكرامة، والكرامة عندنا خط أحمر. قومي يا سمر.. لمي هدومك وهدوم ابنك.
أنا ساعتها كنت واقفة ودموعي نازلة بس مش دموع قهرة، دي كانت دموع فخر بأبويا الراجل العظيم اللي جاب لي حقي وكسر عين اللي حاول يقلل مني ومنه. عادل جيه يمسك إيد أبويا ويعتذر يا عمي حقك عليا، أنا آسف، والله الشيطان غواني، أنا كنت متوتر من مصاريف الجواز والولادة والشغل..
أبويا زق إيده بالراحة وقال له الراجل يبان في المواقف يا عادل، إنت استرخصت مراتك واستكترت عليها اللقمة والدوا وهي نفاس، وما احترمتش شيبة راجل كد أبوك. الفلوس أهي على الترابيزة، وبنتي هتروح معايا ترتاح وتفكر، ولما تعرف قيمة مراتك وابنك وتعرف يعني إيه فتح بيت ومسئولية.. نبقى نتكلم.
أمي أخدت البيبي، وأنا دخلت الأوضة ألم هدومي بسرعة والدموع محبوسة في عيني، بس المرة دي كانت دموع ارتياح مش كسرة. خرجت وشايفة عادل واقف في وسط الصالة مش قادر يرفع عينيه في عين أبويا، والفلوس مفروشة قدامه على الترابيزة تشهد على بخل قلبه وبجاحته اللي انقلبت عليه.
