علبة اكل زهرة الربيع ٤
أنا بقيت بصالها ومش قادرة أنطق.. ندى كانت بتاكل الموت وهي مجبرة وتحت التهديد! كانت خايفة من الفضيحة وخايفة على نفسها منه، وسامح المجرم استغل ده عشان يداري ج*ريمته؛ كان بيسيبها تاكل الأكل المسموم عشان العلبة ترجع فاضية ومشكش في حاجة، وفي نفس الوقت يركز السم في العصاير والمشروبات اللي كان بيدهالي في البيت بالليل!
ندى مسكت إيدي وقالت بتوسل: “أنا كنت بـمـوت بالبطيء بسببه وبسبب خوفي، ولما جيتِ النهاردة وورقة التحاليل طلعت، عرفت إن كبدي خلاص انتهى ومكنش ينفع أسكت أكتر من كده.. أنا بلغت الضابط بكل ده حالا وهو في طريقه للنيابة عشان يواجه سامح بالاعتراف الجديد!”
سبت المستشفى وأنا حاسة إن البشر دول مش بني آدمين.. دول شياطين عايشة وسطنا. رجعت على القسم تاني وأنا منهارة، ودخلت لوكيل النيابة اللي كان لسه مخلص مواجهة مع سامح وأمه والمحامي الهارب اللي الشرطة نجحت في القبض عليه على كمين الصحراوي.
وكيل النيابة أول ما شافني، وقف وقال بأسف: “مدام مروة.. القض*ية أخدت أبعاد تانية خالص.. سامح اعترف بكل حاجة بعد ما واجهناه بأقوال زميلتك ندى وأقوال أخته، والمحامي طليق أخته انهار واعترف بالطبخة كلها.”
دموعي نزلت وقلت: “والشقة والفلوس يا فندم؟”
وكيل النيابة طلع ملف كبير وقال: “المحامي اعترف إن العقود دي كلها تزوير وتدليس، وتم إبطالها رسمياً.. بس الاعتراف المرعب اللي سامح قاله في التحقيق دلوقتي بخصوص المشروبات اللي كان بيدهالك في البيت، هو اللي هيقلب القض*ية دي لجناية تانية خالص.. حاجة أنتِ مكنتيش تتخيليها أبداً يا مدام مروة!”
بصيت لوكيل النيابة ونبضات قلبي وقفت تماماً وأنا بسأله: “حاجة إيه يا فندم؟ سامح كان بيحط إيه في المشروبات بالليل؟”
وكيل النيابة بص للتقرير اللي في إيده، وملامحه اتقبضت وقال بصوت هز كياني كله..
وكيل النيابة أخد نفس طويل، وبصلي بعيون مليانة أسى وذهول في نفس الوقت، وقال: “سامح اعترف إن المشروبات الدافية والعصاير اللي كان بيسقيهالك بالليل في البيت، مكنش فيها سم فئران زي الأكل.. هو مكنش غبي عشان يديكِ جرعة مزدوجة فتظهري أعراض سريعة تفشل خطته.. المشروبات دي كان بيحطلك فيها مادة كيميائية تانية خالص مخدرة ومذهبة للوعي الجزئي، مادة بتخلي البني آدم في حالة استسلام تام ومنوم مغناطيسي، ومبتسبش أي أثر في الدم بعد ٦ ساعات!”
