عزومة حماتي روماني مكرم ١
وشكله واضح إنه سمع آخر جملة قالتها سارة.
حكايات رومانى مكرم
الجو اتجمد.
سارة اتوترت شوية وقالت بسرعة:
“ولا حاجة… كنا بنهزر.”
لكن أحمد ما ضحكش…
كان باصص لي أنا، كأنه بيحاول يفهم.
وقبل ما أتكلم…
دخلت حماتي المطبخ فجأة وقالت:
“العشا جاهز… يلا يا بنات.”
بس وهي بتبص علينا…
حسيت إن فيه حاجة في عينيها بتقول إنها شايفة إن فيه مشكلة.
خرجنا كلنا على السفرة.
القعدة بدأت عادية…
الضحك مالي المكان، والأكل كتير.
لكن سارة كانت كل شوية تبصلي بنظرة تحدي…
وأنا حاولت أتجاهل.
لحد ما حصل الموقف اللي قلب العزومة كلها.
وأنا بمد إيدي آخد طبق السلطة…
سارة قالت بصوت عالي قدام الكل:
“خلي بالك يا ماما… أصل في ناس بتتحرك في البيت كأنها صاحبته.”
السكوت وقع على السفرة فجأة.
أمي بصتلها باستغراب.
وأبويا وقف الأكل في إيده.
أما أحمد…
فبص لأخته وقال ببرود:
“تقصدّي إيه يا سارة؟”
ابتسمت ابتسامة خبيثة وقالت:
“اسأل خطيبتك… هي فاهمة قصدي كويس.”
كل العيون بقت عليّ.
قلبي كان بيدق بسرعة…
لكن قبل ما أتكلم…
#الكاتب_رومانى_مكرم
حماتي قالت جملة خلت المكان كله يتجمد:
“أنا كمان عايزة أفهم…
هو حصل إيه في المطبخ؟”
وفي اللحظة دي…
سارة قالت حاجة ما كنتش أتوقعها أبداً…
قالت سارة بنبرة برود وثقة مبالغ فيها: “حصل إن خطيبتك المحترمة دخلت المطبخ ولما لقيتها بتتحرك بحرية زيادة عن اللزوم وبتفتح الثلاجة كأنها صاحبة بيت، حبيت أفكرها بذوق إنها لسه ضيفة، راحت قايلالي بأعلى صوت: (أنا خطيبي ليه في البيت ده أكتر منك.. وإنتي مالكيش كلام معايا).”
أمي شهقت من الصدمة، وبابا حط الشوكة من إيده وبصلي وعلامات الذهول والزعل على وشه. البيت كله سكت، والمعالق مبقتش تتحرك.
حسيت بنار قايدة في وشي، ودموعي كانت هتخونني وتنزل، بس مسكت نفسي وبصيت لأحمد اللي كان وشه مقلوب وعروق إيده بارزة وهو ماسك كوباية المياه.
وقبل ما أمي تنطق وتدافع عني، وقفت وأنا كلي ثبات -رغم الرعشة اللي جوايا- وقلت بصوت واضح يسمعه كل اللي قاعدين: “أنا عمري ما هقول كلام زي ده، ولا ده أسلوبي ولا تربيتي. أنا دخلت أشرب، وسارة هي اللي دخلت ورايا وقالتلي مفيش عندك إحراج؟ اقعدي على جنب واسكتي ده مش بيتك. وأنا رديت بمنتهى الهدوء وقلت لها أنا باخد على البيت عشان خطيبي، مرامتش الكلام بالطريقة اللي هي بتقولها دي.. لكن هي اللي كملت وقالتلي إنتي محتاجة اللي يعلمك الأدب!”
