٩ شهور روماني مكرم ١
“يا أم سمر، الراجل شاري ومستعد، ومش هيقصر معاها ولا مع عيالها.. أنا حملي تقل يا ليلى، ومبقتش قادر على مصاريف العلاج ولا الأكل، والبيت بيضيق علينا كلنا. البنت لازم تتستر، والعيال ليهم ربنا.”
أمي ردت بصوت باكي ومكتوم: “والعيال يا أبو سمر؟ أنت عارف محمود وأمه، لو شموا خبر إنها بتتجوز هياخدوا العيال في ثانية.. سمر تموت من غير عيالها، دي ما صدقت طلعت بيهم من النار اللي كانت فيها.”
كلامهم كان زي السكاكين اللي بتقطع في لحمي. قفلت ودني بإيديا ورجعت لورا وأنا بصرخ من غير صوت. الدموع جفت في عيوني وحل مكانها نار قايدة. “أنا مش هسكت.. ومش هكون الضحية اللي الكل بيقرر مصيرها، ومش هسيب عيالي للي ظلموني ودمروا بيتي.”
في اللحظة دي، وسط الضلمة والكسرة، فجأة عقلي بدأ يشتغل بشكل تاني. شريط اليوم الملعون ده بدأ يتعاد قدام عيني بالتصوير البطيء. افتكرت تفاصيل صغيرة مكنتش واخدة بالي منها من الصدمة.
* **أولاً:** درج التسريحة والدولاب مكنش فيهم خربوش واحد، القفل متكسرش بعنف، ده كان مفتوح بمفتاح أو بآلة حادة من حد عارف مكان المفتاح السري كويس.
* **ثانياً:** حماتي دخلت الشقة وصرخت وعملت المندبة قبل ما أنا أكتشف السرقة بأقل من دقيقتين، وكأنها كانت مستنية اللحظة دي.
* **ثالثاً والأهم:** محمود كان مسافر الكويت بعد يومين، إزاي تذكرته كانت جاهزة وشنطه متقفلة في نفس الليلة وسافر تاني يوم الصبح علطول؟
الخيوط بدأت تتجمع في راسي. السرقة دي مكنتش من غريب.. السرقة دي كانت ملعوبة، لعبة متفصلة مقاس عشان أخرج بفضيحة، ومحمود يطلقني من غير ما يديني مليم واحد من حقوقي، ولا مؤخر ولا قايمة، ويطلع هو الضحية قدام الناس ويسافر بشقا عمره اللي قالي إنه اتسرق!
الصبح طلع، وأنا أخدت قراري. لبست عبايتي السمرة وطرحتي، وبصيت لأمي وقلت لها: “أنا نازلة وراجعة، ومتفتحيش موضوع العريس ده مع أبويا لحد ما آجي.”
نزلت ورجلي شايلاني بالعافية، بس المرة دي مكنتش سمر المكسورة، كانت سمر اللي بتدور على شرفها وحق عيالها. روحت لبيت العيلة.. المنطقة اللي عشت فيها سنين. وقفت بعيد، مستخبية ورا شجرة قريبة من القهوة اللي على أول الشارع. كنت مستنية “سيد”، الواد الشغال في السوبر ماركت اللي قصاد بيت العيلة، واد غلبان بس عينيه وسط راسه وبيشوف الرايح واللي جاي.
