ولاد اخويا مشكلة عضو

دلوقتي انا واحد عايش حياتي شغل والحمد لله ناجح فيه الي حد كبير وعندي 32 سنة وكنت مقرر اني مش قد مسئولية لا الجواز ولا الاطفال ومش بحب الاطفال اصلا وعايش حياتي لحد ما اخويا ومراته ما.توا
وطبعا المسئول عن مصاريف ولاده هو العم اللي هو انا ومش متخيل غير ان اخويا كمان عشان تقريبا كان بينت.قم مني طلع عليه ديون وانا اللي مطالب اسدد الديون دي عشان البيه كان غاوي منظره ويعيش ولاده في مستوي اعلي بكتير من امكانياته وفي الاخر هو ما.ت وارتاح منها ولبستها انا
هو الفكرة اني فعلا مش فاهم حكمها في الدين انا كعم مختارتش اخويا ولا اختارت ولاده ليه الدين يفرض عليا مسئولية ناس مختارتهاش
ده انا عشان مظلمش حد عشان عارف اني مش بتاع جواز مقرر اني مش هتجوز ولا اخلف يقوم يطلعلي موضوع اخويا ده منين
والمصيبة انهم التلاته في مدارس غالية وانا بصراحة معنديش استعداد اصرف كل فلوسي ومرتبي علي ولاد مش ولادي انا عايز انقلهم لمدارس لغات قليلة او تجريبي بس الكل عمال يضغط عليا بكلام رومانسي وعن الثواب بس معلش ربنا مقالش ادخل مدارس غالية اوي واخويا كان بيستلف ويتداين عشان دول ولاده هو
لكن انا اضحي تضحية الاب الاصلي ليه عشان ولاد مش ولادي في الاخر ولا اختارتهم حد يقولي ثوابك كبير هقوله انا كده كده بصرف عليهم بس عشان اعيشهم في مستوي اللي كان ابوهم مهيشهم فيه هعمل زيه هستلف ويبقي عليا قروض وربنا مقالش كده حد هيقولي ممكن يبقوا سندك لما تكبر هرد
هقوله ممكن لأ ودار المسنين تشهد وممكن اصلا معيشش لحد ما اكبر ويبقوا سند هبقي استفدت ايه
غير ان العيال دي اشقيا جدا جدا وانا كشخص بيكر ه الاطفال مش مستحمل ده
انا المفروض اتعامل معاهم ازاي بجد اكبرهم 10 سنين واصغرهم 4 سنين هم تلاته وأمي ست كبيرة متقدرش تراعيهم انا بعمل اللي اقدر عليه معاهم انا كده كده لابسهم الامر الواقع وانا راجل عملي بس برضه مش مقتنع اني ملزم اعيشهم في نفس المستوي اللي كان معيشهم فيه ابوهم ولا استحمل منهم اللي كان ابوهم وامهم بيستحملوه باختصار لان ده ابوهم الاصلي لكن انا عمهم اللي هم اتفرضوا عليه انا مش عارف امشي الدنيا معاهم ازاي
يعني الواحد اختار يعيش في روقان طلعله مصيبة من حيث لا يعلم
الواحد يعمل ايه عشان يعيش حياته بعيد عن القر.ف مش عارف
–