ابوهم وامهم انفصلوا من ٤ سنين
#متداول منقول علي لسان الأولاد | ده يوسف “3 إعدادي” ومريم “6 ابتدائي” وسارة “3 ابتدائي” من بنها
أبوهم وأمهم انفصلوا من 4 سنين، وبعدها الأب الدكتور اتجوز، والأطفال عاشوا مع أمهم اللي كانت رافعة قضايا نفقة عليه، بس هو شال إيده من المصاريف وامتنع يبعت فلوس للعيال نهائي..
لحد ما الوضع اتأزم، وأمهم قالتلهم: “أنتوا تروحوا تعيشوا مع أبوكم”، علشان كده مش هتعرفوا تعيشوا.. وفعلًا راحوا عاشوا معاه فترة، لكن مراته الجديدة مكنش عاجبها الوضع، لحد ما أقنعته بفكرة متخطرش على بال شيطان حتى.. والأب نفذها!
الأب عمل إيه بقى؟
جابلهم شقة وقعدهم فيها لوحدهم! تلات أطفال بعد مكانوا بيناموا في حضن أبوهم وأمهم وحاسين بالأمان والمحبة، بقيوا عايشين بمفردهم في شقة كئيبه ، شايلين مسؤولية نفسهم من نضافة وأكل وشرب ومذاكرة وكل حاجة ، ورايحين جايين عالأم من الوقت للتاني ، والأب عايش حياتة ومتجوز ومكمل عادي جدًا! وللأسف حسب كلام العيال بيمشي ورا مراته في كل حاجة ومبيثقش في كلامهم ولا بيصدقهم
المـ.ـأسـ.ـاة كبرت أكتر لما سارة البنت الصغيرة امبارح صحيت الساعة 11 الصبح، وللأسف راحت عليها نومة وفاتها الإمتحان، عشان مفيش أم ولا أب يصحوها! راحت لأمها بتبكي وبتعيط وتحكيلها ورجعت الشقة تاني علشان كان وراها درس فالبيت .. وبدل ما الأب يحتويهم ويحل المشكلة، مراته اتعصبت: إزاي تروح لأمها وهي السبب في كل اللي بيحصل ده؟
ودخلت عليهم الشقة تزعق لسارة، ولما سارة ردت عليها ضربتها وشدتها من شعرها والمستر كان هو الي بيحوشها من عليها ، وبلغتهم إن أبوهم بيقولهم: “محدش يدخل البيت تاني!
طب إزاي؟
إحنا ورانا امتحانات!
طب هنمشي فين؟
طب كتبنا عشان نمتحن؟!
برضه لأ!
طب هدومنا؟!
لأ!!
واللي يحزن ويقهر أكتر إن الأطفال بيقولوا إن أبوهم كان واقف بيتفرج ومعملش أي حاجة والنتيجة إيه؟ تلات أطفال في عز امتحاناتهم مرميين في الشارع، وأبوهم وأمهم عايشين وعلى قيد الحياة!
يوسف، أخوهم الكبير، طلع أرجل من ناس بشنبات.. كلم صاحبه وصوروا فيديو بيستغيثوا فيه علشان أخواته البنات ميتبهدلوش، ولما ولاد الخير شافوا الفيديو بتاعهم راحولهم وحاولوا يساعدوهم والكل مستني تدخل عاجل من الجهات المسؤولة وخط نجدة الطفل عشان ينقذوا الأطفال دول من الكابوس ده
حسبي الله ونعم الوكيل..
فين الإنسانية؟ وفين الرحمة؟
وعلشان أي بني أدم معندهوش رحمة ولا رجولة ولا نخوة يدخل يقول القصة من طرف واحد والخرا الي بتقولوه فأي قصة فيها طرفين ، أنا ميهمنيش الأم بتحرض ولا لأ، ولا يهمني جحود وقسوة الأب، ولا حتى هتكلم عن الزوجة الجديدة وجبروتها وإنها السبب في كل ده..
