قصة حسين الغريبة

مين اللي في الصور ة دي  ؟

في مسلسل حديث الصباح والمساء، بيكون فيه مشهد للفنان سامي العدل وهو بيحتضر، فبيجروا يجيبوله الدكتور علشان يشوفه، لكن الدكتور هو اللي بيموت، والعيان بيعيش…

مش عارف ليه افتكرت القصة دي وانا بقلب في الارشيف، وبقرا قصة حسين الغريبة،

حسين (35 سنة)، متجوز ليه 3 شهور، متجوز في قرية، وبعد شهرين من الجواز ساب عروسته وجه يشتغل هنا، ساكن في اوضة لوحده وشغال في ورشة خراطة.

وفي يوم سنة 2010، رجع البيت وكان تعبان جدا، كان حاسس ان رجله يا دوب هتشيله لحد ما يوصل اوضته، وقد كان اول ما وصل اوضته.. وقع معمي عليه..

ابن خالة حسين ساكن في الدور اللي فوقيه، سمع صوت خبطة وقوعه في الارض، نزل عليه.. وراح قايل حسين مات.. وودوه مستشفى أحمد ماهر اللي كشفوا عليه وقالوا البقاء لله.. وادوله تصريح بالدفن..

روحوا بيهه البلد غسلوه وصلوا عليه ودفنوه.. وعريس الجنة.. وملحقش يفرح.. واكيد اتحسد.. وبعد 3 من أيام الدفن.. الميت صحي في القبر… حاول بكل الطرق يطلع السلالم بتاع المقبرة علشان يزق الباب.. لكنه بيقول : “قمت مش شايف أي حاجة، وقعدت أحسس لقيت قطن في كل جسمي، وحسست لقيت الأخوه الميتين حواليا، ومكنتش شايف، الدنيا كانت ضلمه، شعري وقف ووداني وجسمي قشعر وقعدت أرتعش”.

فضل يصرخ وحاول يطلع التلات سلالم اللي يوصلوه لباب المقبرة، لكن حس فيه حاجة ماسكة في رجله، ودا حسب كلامه أصابها بالتيبس وبجرح غائر، تسبب بعدم قدرته علي المشي الا بعكازين”.

“قعدت ازحف وقعدت يومين على السلم أصرخ، وأنادي على حد ينقذني، وفي اليوم الخامس التربي جاب تصريح وأول ما دخل وشافني جاتله أزمه قلبيه ومات”.

التربي اللي دفن حسين.. مات اول ما شافه بحالته اللي هو عليها.. طلعوه ودوه تاني المستشفى.. وطلع كويس.. واجهزته الحيوية كويسة… لكن اتشال من السجلات.. أي ورق تثبت انه دخل مستشفى احمد ماهر قبل كدا ولا انه ادوا تصريح وفاة.. دا برضه حسب روايته..

امه لما جات تزوره في المستشفى .. مستحملتش الفرحة وماتت… وهو نفسه مبقاش قادر يمشي بشكل طبيعي وبقى يمشي بعكازين وشعره ابيض وفضل فاقد النطق لمدة 3 شهور.. مراته جات قالتله طلقني.. انت بقيت عفريت وانا مينفعش اكمل معاك والناس تقولي يا مرات العفريت…

رجع حسين يعيش تاني فوق في الاوضة اللي بيعيش فيها لوحده، بس جسمه اضعف.. صحته معتلة.. ومريض  بوساوس قهرية بتطارده في صحيانه وفي نومه، وشايف ان فيه اشباح عايشة معاه في الاوضة..، واتحول لراجل عجوز مش قادر يمشي وشعره ابيض ونظره شاخص دايما وخايف من الكل.. (والصورة ليه من لقاء سنة 2022).

#بهاء_حجازي