القصة الكاملة

انا قولت من الاول الحكايه فيها واحده ست محراب شر وخرابت بيوت وتربيه زرايب … وراجل مفترى واكل ورث اخواته
اسمعوا بقي الحكايه ..

الي شايفينهم دول العيال وأبوهم الي ضـ ـربـ ـوا نـ..ـار علي الطفـ ـل “محمد أحمد مرسي” الي عنده خمس سنين و هيعيش بعـ ـاهة بسببهم وإلي بالمناسبه يبقوا أخوال الطفل ، هل هم مجانين هيعملوا كدا من فراغ يعني؟ وإيه إلي يوصل أقارب أنهم يعملوا كده فبعض؟ الحقيقه هما معملوش كدا حبًا فالأجـ ـرام ولا كانوا بيجربوا الا،،،ـلحه .. لأن الواقعه دي ليها إمتداد وماضي قديم , فأنا كنت مستني إعلان الداخلية بالقبض عليهم علشان أحكيلكم القصة من البدايه والكلام الي هقوله ده من الروايات الي جمعتها مش من أسره المتهمين فقط , بل من أسره المجني عليهم برضة من القنوات الناقله, وخلينا متفقين مع بعض من البداية أن كل الي هتقرأوه ده مش معناه نهائيًا أني متعاطف معاهم ، لأنهم فعلآ أجـ ـرموا ويستحقوا العقاب الازم ومذنبيين مليون في الميه ، فا أتمني أنكم تكونوا مقتنعين أني مجرد كاتب ناقل فقط ومحدش يخش يقول ده مبرر ولا مش مبرر لأنهم أتقبض عليهم خلاص فالموضوع أنتهي , طيب ايه القصة؟

القصه أبتدت في يوم 8\5\2025 بمشكلة عائليه تخص الورث , ما بين أبو المتهمين ” شريف ” و أخته الي هي جدة الطفل محمد من أمه , المشكله كانت مابين أخوات علي حته أرض زي إي مشاكل ورث مابين الأخوات، ولكن تصاعدت مره واحده لما بنت الأخت ” زوجه الأب وأم المجني عليهم ” أتدخلت وغلطت في خالها , فا خالها قال لاخته بصي يا أختي المشكله كانت عاديه لحد مابنتك غلطت فيا و كرش البنت من البيت ومنعها من أنها تخش بيت العيله تاني , قالتله بس دي بنتي وتيجي فأي وقت , قالها ده بيتنا وأنا حر فيه ولو عاوزه تشوفيها روحيلها هي متجيش هنا تاني , ولكن بنتها مقبلتش بالي خالها عمله وأصرت تروح لأمها بالعند فيه , وراحت ولكن وهي داخله خالها استقبلها وقالها انا مش مانعك أنك تخشي هنا؟ وزقها وحصلت خناقه بينهم , صوتت فالشارع وقالت انا هجبلكم جوزي وهو هياخد حقي منكم كويس

راحت لجوزها وقالتله أنهم تعدوا عليها وعروها فالشارع , جوزها “احمد مرسي” أتحمق عليها ولم أخواته وولاد عمه وولاد خاله وعمامه وكانوا حوالي 11 شخص وراح لخال مراته والخال ده كان مخلف عيلين أسمهم ” أدهم 18 سنه ورفعت 16 سنه ” الي هما المتهمين الي أتقبض عليهم النهارده , “احمد مرسي” راح وسأل خال مراته وقاله ” ايه الي حصل ياعم شريف؟” الخال رد ” كانت فيه مشكله بيني وبين أختي ومراتك أتدخلت وقومت المشكله بينا أكتر فأنا كرشتها من البيت ” , فرد عليه ” بس أنت ازاي تعري مراتي فالشارع؟” , الخال ” دي بتكدب عليك والله محصل هو فيه خال يعري بنت أخوه فالشارع؟ دي عرضي زي بنتي! ”

والكلام أستمر كدا ومحدش فاكر أنه هيكبر وهتقلب مشكله , لحد ما الكلام سخن وابتدت الأيادي تتمد وكان كله بينزل في بعض , ولكن الموضوع خد منحني تاني لما شافوا رفعت أبن الخال ده ماسك ضهره ومتـ ـشرح ومتـ ـعور في ضهره ووشه ومتبهدل , وأدهم برضو كان متـ ـعور ومتبهدل وكل ده متسجل بالفيديوهات وبمحاضر علي أقوال العائلتين , وقتها خدوا أدهم ودوه معهد ناصر مقبلهمش , فخدوهم لمستشفي الدمرداش واتعمله 4 عمليات جراحيه واتكتب فتقرير المستشفي أنه الاداه المستعمله كانت كـ ـتـ ـر الي عمل فيه كدا والسبب هو أحمد مرسي

الخال وعياله فضلوا رايحين جايين عالأقسام والمراكز علشان حق عياله ولكن ده محصلش ومعرفوش يثبتوا , أبتدت الناس تعايرهم فالقريه والرايح والجاي يلقح عليهم بكلمتين بأنهم هيعيشوا وشهم متعلم عليه العيال كانوا بيقولوا لأبوهم (أنهم لما بيمشوا فالشارع بيحسوا ان كل الناس بتضحك عليهم) ، فالنهايه لما يأسوا قرروا شيوخ وكبار القريه التدخل وحددوا جلسه عرفيه بينهم علشان ينهوا النزاع وحكموا بأن بيت أحمد مرسي بالأجماع يعزل من المنطقه ويروح منطقه تاني وبكدا يكون الطرفين أتراضوا وكفي المؤمنين شر القـ ـتال وخلصت علي كدا!

ولكن للأسف الأب والعيال كانت جواهم نار الضغينه والأنتقام بتكبر ومنسيوش , علشان للأسف يقرروا بعد 9 شهور من تاريخ الواقعه أنهم يدبروا ويخططوا مع سابق الأصرار والترصد أنهم يتتبعوا الأب في يوم 19/2/2026 , وطلعوا عليه زي ماشوفنا فالفيديو والحقيقه المره أنهم أه .. كانوا قاصدين يصوبوا علي الطفل الصغير لأن ابوهم قالهم الواد أهو أضـ ـرب فيه , من باب أنه يحزنه علي أبنه زي ماهوا عمل فأبناءه ، وطبعًا بدل مياخد حق عياله أختار طريق شيطاني سوداوي خسر فيه نفسه وعياله ودنيته وآخرته طريق أخرته الهلاك! الغضب لحظة والندم سنين!

دي الروايات الي قدرت أجمعها ليكم علي حسب أقوال العائلتين ولو حد مش مصدق يقدر يبحث بنفسه وهيلاقي كلامهم عالنت , ولكن سواء كانوا هما معاهم حق ولا لأ , فلا دين ولا شرع ولا قانون يسمح أنك تاخد حقك أو تقتصه بأيدك بالطريقة دي , فما بالك بأنك عملت كده في شهر كريم وفي طـ ـفل له حرمته لسه خارج من الصلاه شايل المصلايه بكل براءه؟
بصراحة يجب محاكمة علانيه وعالميه للمجرمين
ليكونوا عبره لكل من تسول له نفسه أن يقتص لنفسه وبنفسه متناسيأ القانون ودور الدوله

لا حول ولا قوة إلا بالله، ايه إلي حصلك يا أمه محمد؟
فالنهاية خطايا الكبار دفعوا تمنها الصغار .. خلي بالكم علي عيالكم ياجماعه ومتخلهمش يتدخلوا فأي مشاكل متخصهمش! أديكم شايفين محدش دفع التمن وتمن غالي أوي غير العيال .. عاوز تعمل مشاكل أتفضل فداهيه بس طلع عيالك منها!