سبب هبوط الكيكة

تعديل 1 :
يا جماعه انا بقالى 14 سنه بشتغل منهم 11 سنة بدى كورسات اونلاين 😅
يعنى لما اقول السبب مش هيخطر على بالك يبقى فعلا مش هيخطر على بالك
مبهزرش و لا بعمل شو 😁

حد عايز يعرف ليه الكيك بعد مايطلع من الفرن حلو وعالى بيهبط و يكش جامد كده ؟
صديقه عزيزه بعتتلى الصور دى من عندها و جاوبتها وحبيت افيدكم لو مهتمين …. السبب ميخطرش على بالك على فكره

تعديل 2:
فى الوقت ده من السنه كل سنه نفس الحركه دى بتحصل مع ناس كتير بتبقى نفس الوصفه اللى بتعملها على طول و نفس المكونات اللى بتستعمل منها نفس نفسها و بعد فتره بترجع تظبط تانى من غير ماتغير حاجه ولا تعرف باظت ليه اساسا

البيض فريش الفرن مظبوط الوصفه صح و التشغيل 100% والمحسن جديد و البيكنج بودر سليم

اللى بيحصل ان الرطوبه العاليه الفتره دى بتتشرب فى الدقيق و تنحس اهله حرفيا لو كيس الدقيق مفتوح و عملتى منه او حتى جديد بس انتاج قبل شهرين تلاته بيكون شترب رطوبه غير طبيعيه بسبب الجو فبتخلى الدقيق كأنه مش موجود فى الوصفه خالص
كانك ضاربه بيض و سكر و مافيش حاجه تمسك نسيج الكيك

الطريف بقى ان نفس الدقيق ده ممكن يظبط فى الكيك الاسفنجى لو معاه كاكاو يعنى الكيك شوكليت سبونج يعنى تحطيهم فى الفرن سوا تطلع واحده حلوة وواحده 🥴

الحل ايه ؟

اشترى كيس دقيق انتاج اقرب ما يمكن
متشتريش دقيق جمله فى اول الصيف او اخر الشتا الا او محتاجاه على طول مش هيقعد

لو عندك دقيق من اخر الشتا قبل ما الحر يبدا يشد قفلى عليه كويس ولو كتير قسميه فى اكياس و حطيه فى التلاجه او الفريزر افضل لو امكن

نفس الكلام لدقيق الاسبونج يستخبى فى التلاجه طول ما الجو حر

لو عندك دقيق شرب رطوبه و ملحقتيهوش مترميهوش طالما سليم مجالوش نمل او حاجه لا سمح الله بس ممكن تستعمليه فى كيك عادى مش اسفنجى او بشاميل بقى و الحاجات التانيه

تابعى الصفحه علشان المره الجايه هقولك البيكنج بيعمل ايه لى اغسطس كل سنه علشان ده مفاجاه محدش بيتبسط منها 🤦🏻‍♀️