نهال عنبر

في شهر مارس 2025 حاولت نهال عنبر تتصل بأخوها عصام اللي عايش لوحده في أمريكا فمردش، حاولت تاني وتالت لغاية ما وصلت لشهر أربعة ومفيش لا حس ولا خبر.. حسيت إن في مشكلة اتصلت بالشرطة واكتشفت إنه توف,,اه الله من شهر ونصف..

وقبل ما احكيلكم على التفاصيل كلها وعشان نفهم مقدار الصدمة اللي عاشت فيها نهال عنبر تعالوا نرجع بالزمن ورا شوية..

والدة نهال عنبر كانت سيدة أعمال في محافظة المنوفية، وأبوها كان دبلوماسي من الشرقية، والد نهال كان بيشتغل في هيئة قناة السويس واللي منحته فيلا في منطقة بورتوفيق سكنت فيها الأسرة لفترة..

في طفولتها كانت نهال بتحب التمثيل والمسرح، ومن أيام ما كانت في المدرسة كانت بتشارك في كل العروض والحفلات المدرسية، وكان مساعدها إنها كانت بنت جميلة وملفتة..

وفي يوم بحكم شغل والدها كانوا حاضرين حفلة لعبدالحليم حافظ، وشافتها صحفية وأعجبت بيها جدا وصورتها والصورة من جمالها اتنشرت غلاف على المجلة، وتشاء الظروف إنه يشوفها المنتج رمسيس نجيب اللي على طول اتواصل مع أسرة نهال..

رمسيس عرض عليهم إنها تشارك في دور في فيلم وادي الذكريات للفنانة شادية وكمان بطولة 3 أفلام تانية، لكن والدتها رفضت العرض بعد ما شافت قبلة في أحد العروض الخاصة للأفلام، وتخيلت ابنتها في المشهد نفسه..

نهال اتصدمت من رد فعل والدتها وقاطعتها شهرين.. والدتها اتضايقت وبعتتها إلى أخوها عصام في أمريكا عشان تكمل دراستها هناك وعشان تبعدها عن فكرة التمثيل في مصر..

من هنا بدأت علاقة نهال بأخوها تبقى أقوى من أي وقت.. أخوها كان طيار وقتها، وكان هو اللي ليها هناك.. وبعد ما خلصت دراستها رجعت مصر واستقرت واتجوزت وحياتها كملتها في التمثيل.. أما أخوها فكان عايش هناك لوحده..

نهال كانت بتتواصل مع اخوها بشكل مستمر، كانت بتواليه على طول عشان تطمن عليه، وفي آخر مكالمة، قالها إنه بعتلها فلوس الزكاة، وقعد يكلمها حوالي ساعة.. كلمها على أحوال مصر وعلى البواب والنادي وكل الناس اللي يعرفهم..

ساعة كاملة عصام بيكلمها دولي وكأنه بيودعها.. بعد المكالمة اتقطعت أخباره تماما..

نهال وقتها كانت انشغلت مع ابنها حسام في أكتر من موضوع، وفضلت بعيدة عن أخوها ومش بتكلمه لغاية شهر رمضان.. وفي بداية الشهر بعتتله قالتله كل سنة وانت طيب لكن ما ردش.. كلمته على التليفون لقيت الخط مش شغال ودي عمرها ما حصلت.. حاولت تبعتله إيميلات وماسيدجات لكن مفيش رد..

من أول يوم في رمضان ونهال ما بطلتش عياط.. عيلتها كلها اتوفت أصلا ومفيش غيره.. ملهاش غيره حرفيا.. كانت بتصل بيه على طول وخايفة تكون كدا بتضايقه.. خايفة تقول حد يكسر عليه الباب أو تعمل حاجة ما يحبهاش..

نهال قعدت تسأل أعمل ايه.. دورت على ناس تعرفهم في أمريكا عشان حد يروح يخبط عليه.. لغاية ما كلمت الدكتور أسامة عشم وهو صديق وكان أول حد ييجي في دماغها.. راح قالها إن محدش هيفيدها من في موضوع زي دا زي فيولا.. وفيولا هي منتجة معروفة وكانت عايشة في كاليفورنيا..

فيولا قالت لنهال إن الحل هو إنها تبلغ البوليس، وفعلا البوليس بدأ يتواصل مع نهال وسألها على تاريخ ميلاده وشوية تفاصيل عشان يتأكدوا إن نهال اخته فعلا..

البوليس وصل للبيت.. ساعة الا ربع مع نهال على التليفون، وهي منهارة مش عارفة تجمع كلمتين على بعض من القلق.. قالولها إن المكان هادي جدا لكن في حاجة واقعة جوة.. وانهم مش عارفين يحددوا..

في النهاية اضطروا إنهم يكسروا الباب.. وأول ما شافوا المنظر راحوا كلموا فيولا وفهموها إنهم لقوه متوفي بقاله فترة طويلة وهو وحيد..

مر على اللي حصل دا شهور لكن الإحساس مش بيفارق نهال.. مش عارفة تتجاوزه أبدا..