توأم صغيرين بيتحولوا لقطط سودة بالليل
سنة 2003 في السويس، انتشرت قصة عن توأم صغيرين عايشين في واحدة من القرى.
أهل القرية بيقولوا إنهم بالليل بيتحولوا لقطط سودة!
الموضوع بدأ لما محمود، موظف جاي من الصعيد،
اتجوز وقعد مع مراته في السويس.
محمود عنده توأم اسمهم وليد ومحمد، لكن لاحظوا عليهم حاجة غريبة، خصوصًا في الليل.
لاحظوا إنهم ساعات يصحوا يقولوا كلام مش منطقي ويحكوا حاجات غريبة، زي مثلًا:
“شفناك يا بابا وإنت طالع السلم، معاك أكل”، ويوصفوا الأكل
والحاجات اللي أبوهم جابها بليل.
ويحكوا إنهم دخلوا عند جارتهم ولقوا عندها أكل على البوتاجاز، ويوصفوا تفاصيل دقيقة جدًا.
في الأول الأب افتكر إنهم بيحلموا، أو ده كلام عيال الجيران اللي بيلعبوا معاهم،
وبدأ يراقبهم وهما نايمين، ما كانوش بيتحركوا من مكانهم.
والموضوع اتكرر كذا مرة، يحكوا عن تفاصيل جوه بيوت الجيران، ومن هنا الرعب بدأ.
بالتدريج بدأ التوأم يحكوا، قالوا إنهم لما بيناموا،
روحهم بتطلع وتدخل في جسم قطتين صغيرين سُود، ويلفوا في الشارع وفي العمارة ويدخلوا شقق
وياكلوا، ولو القطة اتضربت التوأم يحس بالوجع،
ويطلع أثر الضربة في جسمهم.
وده حصل لما مرة واحد ضرب قطة بعصاية، تاني يوم وليد صحي والجرح في دراعه، وقال لأبوه:
“عمو فلان ضربني وأنا قطة”.
الأب سأل جاره اللي قال له:
“فعلاً، أنا ضربت قطة سودة امبارح كانت بتسرق أكل من البيت”.
الأب انهار، بقى مش بينام، ومرعوب يحصل لحد فيهم حاجة.
والغريبة إن لو حد صحّاهم وهما في الحالة دي ممكن يموتوا.
الغريب إن القصة ما كانتش حالة فردية، دي حصلت قصة مشابهة ليها في منطقة الوراق،
وفي الجيزة كانوا توأم بنات اسمهم بوسي ونورا،
نفس الكلام والتفاصيل.
وظهر سنة 2016 توأم مع الإعلامية ريهام سعيد بيحصلهم نفس الحالة، اسمهم مهند ونور، وعملت معاهم لقاء،
وحكوا تفاصيل مشابهة عن إنهم بيتحولوا قطط.
كمان الجيران حكوا نفس الكلام اللي قالوه الولاد، لدرجة إن خلاص لما الناس بيشوفوهم ماشيين بالليل قطتين سُود بيسيبوهم، وما حدش بييجي جنبهم.
مفيش أي تفسير علمي أو منطقي للحالة دي،
لكن في أسطورة شعبية في الريف المصري وفي صعيد مصر بتقول
إن لما يتولد اتنين توأم لازم يرضعوا لمدة 40 يوم من لبن جمل علشان ما تتحولش أرواحهم لقطط وهما نايمين!!!
واللي مش بيشرب لبن الجمل بيحصل له فعلًا الحالة دي،
وبتحوم أرواحهم وهما نايمين في صورة قطط سودة بتدخل البيوت وممكن يتعرضوا للضرب أو الموت.
لكن ما فيش أي دليل علمي على الكلام ده،
ويفضل الموضوع مجرد حكايات ما حدش عارف حقيقتها أو صحتها إيه،
وهل فعلًا التوأم أثناء الليل بيتحولوا لقطط
ولا دي مجرد أسطورة شعبية… كبرت بسبب الصدف!!!
