فيروس نيباه
🔴 فيروس جديد بينتشر في الهند دلوقتي، وحالات طواريء في مطارات دول شرق أسيا… أيه القصة الحقيقية بعيد عن تهويل الإعلام؟
(الموضوع مش خطير والزتونة في الآخر عند النقط الكتير)
القصة كلها بدأت من ساعات في شرق الهند، وتحديدًا في ولاية اسمها “البنغال الغربية”، اللي تعداد سكانها ضخم جدًا وبيوصل لفوق الـ 100 مليون نسمة بناءً على إحصائيات غير رسمية… فجأة السلطات الحكومية والصحية سجلت 5 حالات إصابة مؤكدة بفيروس نادر إسمه “نيباه Nipah”… والحالات دي كان من ضمنها 2 ممرضين شغالين في مستشفى خاص جنب مدينة كولكاتا…
🔹️ طب أيه فيروس نيباه ده بالضبط؟
الفيروس ده يا صديقي بينتمي لعائلة اسمها Henipavirus، والمصدر الأساسي ليه هو خفافيش الفاكهة.. وعشان تبقى فاهم بس، فهو مش فيروس عادي خالص، ومنظمة الصحة العالمية مصنفاه كـ واحد من أخطر مسببات الأوبئة المحتملة في العالم… والسبب هو إنه مالوش لقاح أو علاج، وبيضرب الجهاز التنفسي والعصبي مباشرةً… ونسب الوفيات اللي حصلت منه في حالات تفشي سابقة وصلت حسب تقرير الجلوبال تايمز لما بين 40% و75%…
🟢 انتقال العدوى في الفيروس ده في أغلب الحالات بيحصل من أكل ملوث، أو احتكاك مباشر بحيوان مصاب بالعدوى، أو — وده الأخطر — من إنسان لإنسان في بعض الحالات… والمشكلة إن الإصابة بيه ممكن تبدأ من غير أي أعراض، وبعدين فجأة تتحول لالتهاب رئوي حاد أو التهاب دماغي قاتل… وعشان كده فـ أي ظهور للفيروس ده، حتى لو بحالات قليلة، كفيل يخلي الدول كلها تعيد حساباتها وتاخد إجراءاتها بسرعة للحد من انتشاره…
🔸️ وده اللي حصل فعلًا…
🟣 السلطات في الدول المجاورة للهند دلوقتي بدأت في اتخاذ إجراءات وقائية سريعة… وأولها تايلاند اللي بالفعل بدأت عمليات فحص صحي وكشف ومتابعة على الركاب القادمين من الهند في مطارات بانكوك؛ وخصوصًا اي راكب جاي من منطقة غرب البنغال…
ومع الفحص الدولة بدأت توزع كروت تحذير صحية فيها رسايل لأي مسافر يحس بأعراض زي سخونية أو صداع أو كحة وصعوبة تنفس أو دوخة وتشنجات ونعاس، بإنه يزور المستشفى فورًا للكشف…
🟡 ومش تايلاند بس، كمان النيبال رفعت حالة الاستعداد القصوى في المطارات والحدود البرية ونقاط العبور مع الهند… وبدأت فحوصات صحية على الركاب والمسافرين في المطارات عشان يحدوا من أي انتشار محتمل للفيروس خارج حدود الأراضي الهندية…
هي أصلها مش ناقصة خالص ندخل في قصص تاني بسبب الخفافيش 😃
🔵🟢🟠 مهم أوي أؤكدلك إن لحد دلوقتي لسه منظمة الصحة العالمية لم تصدر أي تحذيرات عالمية ومرفعتش حالة الطواريء، والوضع تحت السيطرة ومفيش أي حاجة غير معتادة… هو آه فيروس خطير بس هما واخدين احتياطاتهم والدنيا كويسة…
🛑 بقولك كده بس عشان الصفحات اللي هتبدأ كمان شوية تهول من الموضوع وتكبره وتتكلم عنه باعتباره جائحة جديدة جاية تدمر العالم… كل الكلام ده مش حقيقي…
🔸️ كالعادة هسيبلك تفاصيل الموضوع كلها في المصادر تحت في أول كومنت 👇 وهسيبلك معاها مراجع ونشرات علمية بتتكلم عن تفاصيل وخصائص الفيروس ده عشان تبقى فاهم كل حاجة عنه…
🔴وفي النهاية متنساش تعمل شير للموضوع لو وصلك وعرف غيرك بالقصة..
شكرًا.
للكاتب محمود علام🩵
