صديقة طليقة القاضي المتهم

صديقة طليقة القاضي طلعت تدافع عن صاحبتها وتفند مزاعمه وإدعاءاته إللي قالها قدام المحكمة.. وده إللي قالته👇👇👇

أنا عاملة الفيديو ده عشان أرد على الكلام اللي إحنا عمالين نشوفه ونسمعه على الفيسبوك من امبارح، والحملة المشوهة المغلوطة اللي معمولة على السوشيال ميديا قبل جلسة الحكم بشهر، عن قضية شغالة في الجلسات والمحاكم من شهر سبعة اللي فات.

بس طبعاً نتيجة إن محاولات دفع فلوس لأهل القتيلة عشان يتنازلوا عن القضية باءت بالفشل، فطبعاً الحل إيه؟ إننا نعمل حملة على السوشيال ميديا ونشوه في سمعتها والناس تطلع تسقف 👏 والناس تطلع تنبسط، وطبعاً الرجالة ينبسطوا ويسقفوا ويقعدوا يشتموا فيها وهم ولا يعرفوها ولا يعرفوا إيه اللي حصل أصلاً.

الاستقالة بسببها

هتكلم على كل نقطة هو قالها. سيادة المستشار، قاضي في مجلس الدولة سابق، هو ماسابش الشغل عشان هي كانت بتشتكيه في التفتيش، ده ماحصلش.

هي كانت رافضة تماماً تشتكيه في التفتيش أو إن هي تعمل فيه أي محضر رغم اللي هو عمله فيها حاجات كتير جداً، وهي كانت رافضة إن هي تعمل فيه محضر أو إن هي تقدم فيه أي شكوى عشان خاطر ولادها وعشان خاطر مستقبل ولادها، ده لأن هي كانت بتأمل إن هي تشوف أولادها الاثنين شرطة ونيابة فكانت بترفض تماماً إن هي تعمل كده.

ورغم إن هو كان قال لها إن هو هيقدم استقالته عشان يتجه للعمل الحر، معارض عربيات ومحلات حلويات باسم بنته، هي كانت رافضة الموضوع ده تماماً عشان خاطر مستقبل ولادها وكانت بتتحايل عليه إن هو ما يعملش كده وما ياخدش الخطوة دي، لكن للأسف هو أصر عليها وعمل ده عشان يتفرغ للعمل الحر بتاعه، رغم إن هو كاتب كل حاجة باسم أخوه عشان موضوع النفقة طبعاً أنتم عارفين مش محتاجة أشرحها يعني.

يبقى كده خلصنا موضوع إن هو استقال بسبب شكاوي التفتيش، ماحصلش، لا عملت شكاوي في التفتيش ولا عملت محاضر فيه عشان خاطر كانت شايفاه إن هو أبو ولادها ما ينفعش تعمل فيه حاجة زي كده.

الزواج العرفي

الحاجة الثانية إن هي كانت متجوزة عليه عرفي وهو وهي على ذمته، يعني ده غلط تماماً وده ما حصلش 😔 وحسبي الله ونعم الوكيل في اللي هو قاله.

واحد بدل ما يندم على اللي هو عمله بأن هو أنهى حياتها وحرم ولادها منها وحرمنا كلنا منها، إن هو كمان يكمل ويزود إن هو يقول عليها الكلام ده! يعني إن هي كانت متجوزة عرفي؟ طيب اللي كانت متجوزة عرفي وهي على ذمتك، اللي هي مطلقة منك من أربع سنين، حضرتك لما اكتشفت الموضوع وهي إن هي اتجوزت وهي على ذمتك مارفعتش عليها قضية زنا ليه؟ بلاش، مقتلتهاش ساعتها ليه كراجل كده عنده نخوة وكنت هتطلع منها كده إن هي قضية شرف؟ ما عملتش كده ليه؟ تقتلها بعد أربع سنين عشان هي اتجوزت عليك عرفي وهي على ذمتك؟ هل ده يعقل؟ ما اللي يقول كلام يا جماعة هنفكر فيه ونعقله وبعدين نبقى نقول اه فعلاً ده حصل عشان الناس اللي مشيت وراه من غير تفكير.

إن هي كانت متجوزة عرفي وهو اكتشف وأما شافها مع جوزها قتلها برضه ده ما حصلش، لأن هي كانت متجوزة رسمي وتم كتب الكتاب في بيت خالها بوجود أهلها وبوجودنا وكنا كلنا حاضرين معاها وما كانش في الكلام ده خالص. بخصوص إن هو الموضوع كان وليد اللحظة عشان رجولته قامت عليه ونخوته قامت عليه، لا ده برضه ما حصلش لأن هو مبيت النية من قبلها إن هو كان ناوي إن هو يقتلها وهددها أكتر من مرة وبلغني الكلام ده.

مرة جه عند شغلي قبل الواقعة بشهرين تقريباً ويشهد على مجيه عندي الشغل طلعت من باب الشغل أنا وزميلتي، وزميلتي كانت تعرف المرحومة وشافته وسابتني واقفة معاه لأنه كان عايز يتكلم معايا، وبرضه كان عمال يقول لي إن هي اتجوزت، وقلت له ما تسيبها تتجوز ما أنت اتجوزت وخلفت إيه المشكلة يعني؟ ليه تعمل كده؟ ليه ما تسيبها تتجوز وتعيش حياتها ما أنت عشت حياتك واتجوزت وخلفت وعملت فرح كبير وما اتهزتلكش شعرة إن هي تتضايق ويتحرق دمها، ليه مدي حق لنفسك إن أنت تعمل كده وهي لا؟ لا أنا أتجوز وهي ما تتجوزش!

وبعدين أنا إزاي آمن على ولادي؟ قلت له الراجل محترم جداً وبيعامل ولادك أحسن معاملة، حد من ولادك اشتكى لك؟ قال لي مش هستنى. قلت له لا معلش يعني الراجل محترم جداً ومراعي ولادك وبيصرف عليهم في الوقت اللي أنت بقالك أكتر من سنة عامل لهم بلوك! يعني أنت كنت كل أما تعرف إن هي في حد متقدم لها أو إن هي داخلة على مشروع جواز كنت تفضل تلف حواليها لحد ما تبوظ لها الموضوع وتوهمها إن أنت هترجع لها بمجرد ما الموضوع يبوظ تسيبها وتمشي وتختفي.

ما خلاص بقى ما تسيبها تعيش حياتها، وبعدين ولادك يا سيدي ما أنت شوفهم، هي منعتك إن أنت تشوف ولادك؟ أنت اللي عامل لهم بلوك. وبعدين ما هي قبل كده كانت بتسيبك تشوف ولادك وتيجي تاخدهم من البيت وترجعهم على البيت، عملت إيه قبل كده؟ قلت لها تعالي نقضي يوم في إسكندرية وخدتها هي والولاد وكنت هتقتلهم هناك واتصلت بينا تستنجد، ولا نسيت؟ 😳 طب بلاش المرة اللي أنت أخدتهم برضه لوحدهم ورحت على كوبري قصر النيل عايز ترمي ابنك الصغير، شلته وكلمتها فيديو كول عشان توريها إن أنت بترمي ابنها لولا إن الناس اتلموا عليك وأخدوا منك الولاد وهي راحت استلمتهم، ورغم ده كله ما رضتش تعمل فيك محضر عشان خاطر أنت أبو ولادها.

عارف لو كانت تعرف إن أنت هتنهي حياتها إحنا ما كناش وافقناها إن هي ترفض، إحنا كنا بنقول لها تروحي تعملي فيك محضر وهي كانت بترفض. فحسبي الله ونعم الوكيل فيك، مش هقدر أقول أكتر من كده، وحسبي الله ونعم الوكيل في كل واحد بيردد كلامك وبيصدقه من غير ما يفكر فيه، وحسبي الله ونعم الوكيل في كل واحد شارك في الحملة القذرة اللي أنتم عاملينها دلوقتي عليها، ده رمي محصنات على واحدة هي دلوقتي عند ربنا مش هتقدر ترد على الكلام اللي بيتقال بس إحنا موجودين وهنرد وأنا عندي استعداد أروح أشهد وكلمت المحامي بالفعل وهروح أشهد وهشهد عليك وهقف قدامك وهقول كل كلمة دلوقتي أنا بقولها وأنا باصة في عينيك وراهنك لو أنكرت.

أنت كنت مبيت النية إن أنت تعمل فيها كده تقتلها، أنت لما جوزها كلمك وقال لك ما عنديش مشكلة إني أجيب الولاد لحد عندك تشوفهم، إيه مشكلتك؟ هي بقت مراتي مالكش دعوة بيها هنجيب لك الولاد لحد عندك، أنت رفضت وقلت لا هم باكدج ياخدهم كلهم يا سيبهم كلهم.

قال لك خلاص وأنا كفيل بيهم، اللي هو أصلاً لحد دلوقتي بيصرف عليهم وهو اللي بيسأل عليهم وهو اللي رايح جاي عليهم وهو اللي مهتم بيهم اللي كانوا في عزاها وفي دفنتها قاعدين في حضنه، أنت عملت إيه في ولادك؟ الراجل ده أحن عليهم منك 💔

مش عارفة أقول إيه بجد حسبي الله ونعم الوكيل فيك، وحسبي الله ونعم الوكيل في كل واحد بيصدق كلامك وبيردده وبيقول كلمة وحشة في حقها. أنت لا استقلت بسببها ولا قتلتها عشان اكتشفت إن هي كانت متجوزة عرفي، أنت عارف إن هي كانت متجوزة ومتجوزة رسمي في بيت أهلها. قال إيه كانت متجوزة عرفي وهي على ذمتك! حرام عليك أنت بتبوظ سمعتها، على فكرة دي سمعة ولادك.

ده أنت كنت مقعد أخوك معاها أيام ما كنت متجوزها، كنت مقعد أخوك الكبير ده معاها في بيت واحد! كانت تقول لك إزاي حرمة بيتك وحرمة مراتك أنت معيش أخوك الكبير معايا؟ أنا مش عارفة أروح وأجي في البيت، وكنت بتجبرها على كده ولما كانت بتتخانق معاك كنت بتطردها من الشقة فاكر ولا نسيت؟

أنا مش عارفة أقول إيه والله العظيم ما عارفة أقول إيه غير حسبي الله ونعم الوكيل فيك وحسبي الله ونعم الوكيل في كل كلمة قلتها، وبشكر وكيل النيابة ولا رئيس النيابة أنا ما عرفش ألقاب أنا آسفة جداً، بس إن هو شرح القضية بكل ملابساتها وما سابش نقطة ما اتكلمش فيها ووضحها، فياريت كل الناس اللي بتسمع كلامه وبتصدقه تسمع مرافعة النيابة وتفكر فيها وتفهمها عشان هو ده اللي حصل فعلاً.

الراجل ده مبيت النية إن هو يقتلها وكنت بحذرها بقول لها إنه جالي وقال لي كذا كذا تقول لي لا لا مستحيل ده قاضي سابق يا بنتي عارف كويس أوي إن هو ما ينفعش يعمل كده وما يقدرش يعمل كده في ولاده يحرمني ويحرمهم مني.

ده لما جه قال لي أنا هقتلها وأقتل نفسي وبتهدد ولادك؟ قال لي آه إيه المشكلة ما أنا هقتل نفسي، طب ولادك؟ هقتلهم هم كمان! 😥 ده كان كلامك معايا بالحرف وأنا هاجي وأقوله في وشك. حسبي الله ونعم الوكيل.”