تفريز الكرنب
لو ورق الكرنب بيجلد معاكي بعد التخزين
وتعبي نفسك وفي الآخر يطلع مش مظبوط
شوية نصايح مجرّبة
ومن النهارده ودّعي مشكلة الجلدان خالص
والكرنب هيطلع معاكي طري ويشرفك في أي عزومة
وأنتِ بتسلقي الكرنب ضيفي شوية سكر ومتحطيش ملح، لأن الملح بيمتص الميه اللي في الورق وبيخليه يجلد
اسلقي الكرنب نص سلقة بس، ولما يبرد رصيه كويس ودخليه الفريزر
وأنتِ بتطلعيه من الفريزر أوعي تفكي الورق على الآخر مرة واحدة
طلعيه وحطيه في طبق، وانزلي عليه ميه دافية، هيفك من بعضه بسهولة واستخدميه على طول
وأهم حاجة وأنتِ بتسوي المحشي، سيبيه يغلي كويس مش أقل من ربع ساعة على نار عالية علشان نتأكد إن الرز استوى، وبعدها هدي النار وسيبيه يكمل تسوية كمان شوية، كده هيطلع مظبوط
معاكي إن شاء الله
ومتنسيش تحطي أعواد بقدونس وكزبرة وشبت وقطع فلفل أخضر في قاع الحلة تحت المحشي، علشان وهو بيغلي يملى ريحة البيت كله خير
وبألف هنا ♥️
