ام الحويطات

على أطراف الصحراء الشرقية جنوب غرب سفاجا هتلاقي قرية اسمها أم الحويطات.
كانت زمان من أهم مناطق استخراج الفوسفات في مصر..

العمال كانوا عايشين هناك مع أسرهم، وكان في بيوت ومدرسة ومسرح ووحدة صحية ومركز شباب.
المكان كان مليان حياة وحركة طول اليوم، والناس رايحة جاية.

كان في عمال شغالين في الجبال والمناجم وبيكسّروا في كهف تقريبًا، وفجأة الكهف وقع عليهم وكلهم ماتوا، ودي كانت من أول الحوادث اللي هزت المكان.
بس مش هي السبب الوحيد اللي خلا الناس تمشي، لأ، في قصص تانية أخطر وأغرب..

من أشهر القصص إن راجل كان ماشي في القرية وسمع صوت صريخ طالع من بيت.
جري يشوف في إيه، والناس اتلمت وكسروا الباب، وأول ما دخلوا شافوا ست مرمية على الأرض، جسمها متفحم كأنها اتحرقت، مع إن البيت مفيهوش نار ولا حريق..

والست دي كانوا عارفينها، وده مكنش شكلها خالص. الصدمة كانت كبيرة، والشرطة والمطافي وصلت بعد وقت بسبب بُعد المكان.
وبعد التحقيق اتقال إن الست دي كانت بتعمل………….
وبعد التحقيق اتقال إن الست دي كانت بتعمل

أعمال وسحر.

الأغرب بقى إن كان في أوضة مقفولة محدش قدر يفتحها غير راجل أمن، ولما فتحوها شافوا منظر مرعب:
حاجات متعلقة من السقف، مربوطة برؤوس حيوانات، ورجول فراخ، وحيوانات ميتة مرمية على الأرض، ودم في كل مكان، وكتب سحر وصور ناس معمول لهم أعمال.

لحد ما صدر قرار بتصفية شركة الفوسفات من أكتر من عشرين سنة. ساعتها الحياة وقفت واحدة واحدة، والناس سابت بيوتها ومشيت تدور على رزق تاني، وفضلت البيوت فاضية، والأبواب مخلعة، والشبابيك مكسورة، واتُهجرت قرية الحويطات..

مع السنين المكان اتحول لمدينة مهجورة، الشوارع فاضية، وده اللي خلى حكايات كتير تطلع عن الجان وأصوات بتظهر بالليل.

ناس بتقول إنها سمعت همسات جوا البيوت القديمة، وناس تانية تحلف إنها شافت خيالات بتتحرك وسط المباني المهدومة.

القصص دي مفيش عليها دليل واضح، بس الغموض حوالين المكان خلاه بيغري أي حد يحب المغامرة.

عشان كده منظمين رحلات السفاري بقوا ياخدوا ناس تزور القرية، يتمشوا وسط أطلال المدرسة والمناجم القديمة، ويحكوا لهم عن أيام الشغل زمان، وكمان عن قصص الجان اللي اتربطت بالمكان.

مع الوقت بقى اسم أم الحويطات مرتبط بالرعب والغموض أكتر من الفوسفات نفسه.

وفي ناس شايفة إن الأفضل يتوثق تاريخها الصناعي بدل ما تفضل مجرد حكايات عن أشباح وجن، لأن في الآخر دي كانت قرية حقيقية عاش فيها ناس وكان ليها دور مهم في اقتصاد البلد.

لو سمعت عن القرية قبل كده شاركنا تجربتك في التعليقات..