ابن وفاء صادق
-في حديث تلفزيوني تحدثت الممثلة وفاء صادق عن مرض ابنها بالديسليكسيا
وفاء إنتي مريتي بتجربة مع ولادك، حد منهم كان عنده (ديسلكسيا)، عايزين نسلط الضوء عليها عشان الناس تعرف اكتر عن الحالة دي ،، احكيلي التجربة دي بدأت إمتى؟ وإزاي اكتشفتيها؟”
= الموضوع بدأ وهو في تالتة ابتدائي وأنا بذاكر له، لاحظت أن ابني “نور” ذكي جداً، بيحفظ الأغاني بسرعة، بيفهم كل حاجة بتتحكي له، بس لما نيجي نقعد قدام الكتاب الدنيا بتبقى سـودة. كان بيعاني عشان يقرأ كلمة من تلات حروف، والمدرسة بتبعتلي شكاوى إنه مش مركز أو “مكبر دماغه” من المذاكرة.
– وإيه اللي خلاكي تشكي إن الموضوع أكبر من مجرد كسـ.ـل؟
= بقيت أراقبه وهو بيقرأ، لقيت عينه بترفّ أو بيبعد الكتاب، ولما سألته “إنت شايف إيه؟” اكتشفت إنه بيشوف الحروف بتتحرك، ويقولي الحرف بيعضني! الحرف مش ثابت مكانه، أو بيشوف الحرف مقلوب، يعني حرف الـ (ب) يشوفه (ن)، والكلمة بالنسبة له عبارة عن “رسمة” مش حروف بتتركب جنب بعضها.
– وإزاي عرفتي إن دي حالة اسمها “ديسلكسيا”؟
= الفضل لربنا وللأستاذة سمية الألفي. كنت قاعدة معاها وبحكي لها عن اللي بيحصل مع نور، بصت لي وقالت لي فوراً: “وفاء، ابنك عنده ديسلكسيا” ولازم تروحي لدكتور ، قلت لها: “يعني إيه؟”، قالت لي: “أنا حصلي ده مع عمر ابني، وكنت بضر.به وبقسى عليه جداً ولما سافرت وشخصته عرفت الحقيقة واعتذرت له وبست إيده”.
– هل التشخيص ده ريحك ولا قلقك؟
= ريحني جداً لأني عرفت إني مش بظلمه. رحت لمتخصصين وعملنا اختبارات ذكاء، وطلعت النتيجة إن ذكاؤه عالي جداً، بس مخه بيستقبل المعلومة المكتوبة بشكل مختلف. عرفت إنهم أشخاص بيعتمدوا على الفص الأيمن من المخ، المسؤول عن الإبداع والخيال، مش الفص بتاع التلقين والحفظ.
بيشوفوا الأشياء بشكل ثلاثي الأبعاد (3D)
فالحرف المكتوب على الورقة بيبقى “Flat” (مسطح) وممل ومخهم مش عارف يترجمه صح، فبيشوفوه بيتحرك أو بيهرب منهم. لكن لو شرحت له بالصور أو بالرسم أو بفيلم، بيستوعب فوراً وبيبقى أشطر من أي حد.
– إيه اللي اتغير في حياتكم بعد ما عرفتي؟
= غيرت طريقة المذاكرة تماماً، اعتمدت على السمع والصور، وبقيت متبنية فكرة إن الأطفال دول عباقرة بس محتاجين “مفتاح” مختلف. وطبعاً زي ما سمية عملت مع عمر، أنا كمان اعتذرت لنور وبست إيده عشان كنت بظلمه وأنا مش فاهمة.
– يعني الديسلكسيا معطلتوش إنه ينجح؟”
= بالعكس، دي كانت ميزة لما فهمناها. أنا فخورة بيه جداً لإنه قدر يتخطى كل الصعوبات دي ،، نور دلوقتي اتخرج، هو خلص Computer Science (علوم حاسب آلي)، وما شاء الله شاطر جداً ومتميز في مجاله، وده اللي بحاول أقوله لكل أم: ابنك مش فاشل، هو بس محتاج يروح للحتة اللي مخه بيبدع فيها.” 👏♥️ 📺
