نسيت حفيدتها

نسيتها 8 ساعات في الحر.. طبيبة أمريكية تتسبب في وفاة حفيدتها الرضيعة داخل سيارتها

غلطة كلفتها حياة حفيدتها.. طبيبة أمريكية في ولاية كنتاكي سابت الطفلة اللي عمرها 10 شهور مقفول عليها في العربية لمدة 8 ساعات بالكامل قدام العيادة اللي بتشتغل فيها، عشان تفارق الحياة بسبب درجات الحرارة العالية.

يوم 13 أغسطس اللي فات، الدكتورة ستايسي فازينبيكر اللي عندها 61 سنة، عرضت إنها تاخد حفيدتها سكوتي جوين كرويل وتوصلها للحضانة في طريقها. لكن بدل ما تروح الحضانة، ستايسي ساقت عربيتها وراحت على شغلها في مركز أوينزبورو الصحي بمدينة ماديسونفيل، ونسيت الطفلة مربوطة في الكرسي الخلفي للعربية.

الكارثة اتكشفت على الساعة 4 العصر، لما والد سكوتي راح الحضانة عشان يستلمها، بس الموظفين هناك بلغوه إن البنت مجتش أصلا طول اليوم. العيلة بدأت تتواصل مع بعضها واكتشفوا إن الجدة راحت على الشغل على طول ونسيت البنت في العربية.

الرائد جيسون ماكنايت من شرطة ماديسونفيل قال إن الجدة بمجرد ما أدركت اللي حصل، جريت بره العيادة مع زمايلها عشان تنقذ الطفلة، لكن الوقت كان اتأخر جدا. ضباط الشرطة حاولوا يعملوا إسعافات أولية لإنعاش الطفلة أول ما وصلوا، لكن محاولاتهم فشلت. درجات الحرارة بره العربية في اليوم ده وصلت لـ 95 درجة فهرنهايت، لكن جوه العربية المقفولة الحرارة ضربت لـ 115 فهرنهايت، وهو رقم قاتل لأي طفل.

المأساة دي حصلت بعد سنة واحدة بس من نقل ستايسي لماديسونفيل عشان تكون قريبة من بنتها سيدني كرويل، والدة الطفلة واللي بتشتغل هي كمان دكتورة نسا وتوليد في مستشفى محلي. سكوتي كانت الطفلة التانية للأسرة، واتولدت في سبتمبر 2025 بعد عملية تلقيح صناعي، وده خلى صدمة فقدانها أشد قسوة على العيلة اللي نعتها خالتها إيمي فازينبيكر في بوست على فيسبوك وكتبت “بنحبك أوي يا طفلتنا الحلوة”.

لحد دلوقتي الشرطة ما وجهتش أي اتهامات رسمية للجدة، والتحقيقات لسه مستمرة. السلطات عملت تحليل مخدرات وكحول لستايسي، ورغم إن المؤشرات بتقول إن النتيجة هتكون سلبية، لكن الشرطة بتدرس عرض القضية على هيئة المحلفين الكبرى لتحديد إذا كانت هتواجه اتهامات جنائية، في الوقت اللي العيلة بتنتظر فيه نتيجة التشريح الطبي اللي هيحدد سبب الوفاة الرسمي.